لا للمخدرات و حملة توعية يشارك فيها ناجي اسطا – خاص

إنها صرخة أراد الأب مجدي العلاوي مؤسس جمعية “سعادة السماء” إطلاقها بمناسبة اليوم العالمي للمخدرات. إنها صرخة ضد كل من يشرّع ضمناً تجارة المخدرات والاستفادة من مردودها المادي والمعنوي. فالمخدرات هي أساس تدهور المجتعات، هي لولب الجرائم، هي الوسيلة الأسهل لتحطيم طموح الجيل الشاب وتحويله إلى عبد مأمور تابع ومذلول.

“ما حدا فوق راسو خيمة” هو عنوان الحملة التي نطلقها اليوم، فلا أحد يمكن أن يعتبر نفسه بمنأى عن المخدرات أو أقله بمنأى عن تداعيات من يتعاطى المخدرات. فشبابنا إما يقعون ضحايا المخدرات مباشرةً وإما تُفتعل بهم الجرائم على الطرقات وفي الأحياء بسبب المخدرات. إذ ترتبط بالمخدرات جرائم كثيرة كحوادث المرور، كما تلحق أضراراً بالغة باقتصاديات الدولة مثل تخفيض الإنتاج وهدر أوقات العمل، وخسارة في القوى العاملة سببها المدمنون أنفسهم والمشتغلون بتجارة المخدرات وإنتاجها، وضحايا لا علاقة لهم مباشرة بالمخدرات، وانحسار الرقعة الزراعية المخصصة للغذاء وتراجع التنمية وتحقيق الاحتياجات الأساسية

المخدرات هي السلاح الأقوى لانهيار المجتمعات، فهي تستهدف ركيزة المجتمع، تستهدف كل شاب وصبية حان الوقت كي يحققوا أحلامهم وطموحاتهم، حان وقتهم كي ينتقلوا إلى مرحلة الإبداع والإنتاج. فتأتي المخدرات وتضرب عصب المجتمع من دون رحمة. هذا عدا عن فشل التعليم والفقر والبطالة والتقوقع وعدم الاندماج مع البيئة المحيطة.كما تقضي المخدرات على العائلات وتفككها من دون أي رادع، فإذا وقع فرد من أفراد العائلة في شرك المخدرات، تتزعزع العائلة وتتصدع الخلايا الاجتماعية باعتبار أن العائلة هي الخلية الاجتماعية الأولى

ومن الجدير ذكره أن تجّار المخدرات يستخدمون غطاءًسياسياً اقتصادياً شرعياً وأنشطة اجتماعية وسياسية تحميهم من الملاحقة القانونية

في كلمة خاصة لموقع شارع الفن اشار النجم ” ناجي اسطا ” ان افة المخدرات يجب ان تنتهي فورا بفضل حملات التوعية لان فعلا هذه المواد تؤثّر سلبا بحياة اي طالب جامعي واي رب عائلة و اي موّظف لانها تسيطر على عقله وتدّمر جسمه بشكل سريع ولا يستطيع على المدى الطويل ان يتخّلص منها بشكل عادي بل يجب عليه الخضوع لتدريبات و الدخول الى مستشفى خاص للمعالجة . الفن و الفنانين ليسوا بعيدين عن هذه التجربة الكارثية وليس صحيحا ان بعض الفنانين يتناولون هذه المواد ليصبحوا بحال افضل بل بلعكس هي تفقدهم صوتهم على المدى الطويل مشددا الى انه مستعد لطرح عمل خاص للتوعية

الاعلامية ريميه درباس وفي كلمتها ايضا شدّت على يد اسطا و الاب علاويّ معلنة ان ل وسائل الاعلام الدور الاكبر في توعية الجيل الشاب لان فيه تاثير مباشر على المتلقّي من خلال بعض البرامج و الفقرات داعية الجميع الى الابتعاد عن مواد تسمم الجسم وتهلكه

كلمة الأب مجدي العلاوي

“ما حدا فوق راسو خيمة” عنوان حملتنا يلّي رح تنطلق اليوم عبر كافة وسائل الإعلام. اليوم عم ندق ناقوس الخطر، اليوم عم نطلق صرخة نقول فيها لأ ما رح نقبل تمحونا وتمحو ولادنا من ورا المخدرات. إذا بدنا نحكي أرقام، لفتني تقرير انعمل مؤخراً مع قوى الأمن الداخلي، تقرير بيخلّينا نحس بحالة هلع قدام الواقع يلي عم نعيشو اليوم

فبناءً على أرقام مكتب مكافحة المخدرات في قوى الأمن الداخلي وتقرير عملتو منى لبكي ارتفعت نسبة انتشار تعاطي المخدرات بشكل صادم وبسرعة قياسية من العام 2012 للعام 2016، فبالعام 2012 تم ضبط 240كيلو من حشيشة الكيف بينما في العام 2016 وصلت لـ7600 كيلو، هيدا إذا ما حكينا عن باقي الأنواع من الكوكايين والماريوانا، والصدمة الأكبر حبوب الكابتاغون فمن 463.000 حبة مضبوطة عام 2012، إلى تقريباً 13 مليون حبة عام 2016. و أكثرية من يتعاطى المخدرات هم لبنانيون ذكور

قدام هيدا الواقع المؤلم بدنا نقول “نحنا وين من هيدا كلو”؟ الدولة وين؟ العيون الساهرة وين؟ هل السجون هي المكان الأمثل لإعادة إصلاح المجتمع اللبناني؟

المدمن ممكن يعمل جريمة بدم بارد، المدمن ممكن يسرق، المدمن ممكن يشحد، المدمن ممكن يروح بطريق الدعارة، المدمن ممكن يقتل، والمدمن ممكن يقتل حالو. وبعدكن بتسألو ليش عم ترتفع نسبة الجريمة والعنف بالمجتمع اللبناني؟ منشوف الجريمة وقعت، منركّز عالجريمة، ومننسى ما وراء الجريمة، منقاصص الفاعل بالسجن، وخبروني أي سجن بلبنان عم يردع موضوع التعاطي مجدداً. بيطلعوا من السجن أسوأ من الأول، والمجتمع بيهمّشن أكتر من الأول، وبيصير عدن حل من اثنين: أو بيرتكبوا جريمة جديدة بحق غيرُن لينتقموا أو بيلجأوا للانتحار. يا موت يا موت من نوع آخر. هيدا مجتمعنا

ما فيي خبّركن عن أمهات ماتوا بكير كتير من ورا إبنن المدمن، ما فيي خبّركن عن آباء انكسر ضهرُن من ورا إبنن يلي شطب إسم العيلة بالمخدرات، ما فيي خبركن عن عائلات تفككت وما بقي مين يخبّر. والأهم من هيدا كلو، ما فيي خبّركن عن معاناة المدمن، عندي بقرية الإنسان حوالي 60 مدمن اليوم، البعض منن قطع شوط كبير، والبعض الآخر بعدو بأول الطريق، هيدول شباب بدّن حُب، الشفاء الوحيد بيكون بالحُب وبالحب الأعظم يسوع المسيح

ببداية المشوار، يعني من حوالي الـ 20 سنة، استوقفني مشهد الموت غير المباشر عالطرقات، شوف ضحايا المخدرات مرميين عالطرقات. استوقفني اتصالات كتيرة من أمهات عم يترجّوني ساعد ولادُن تيوقفوا إدمان عالمخدرات. فطلبت من يسوع يساعدني، أخدت هالشباب ورحنا نعيش بخيمة، نعم بخيمة، ومن هون قررنا يكون عنوان حملتنا “ما حدا فوق راسو خيمة”. وهالخيمة كبرت، وتوسّعت، سجّلنا فيها انتصارات كبيرة، وحالات حب كبيرة، وحالات إيمان وارتداد لنبع الحب يسوع المسيح. ومن هالخيمة صار عنا قرية الإسنان وقرية مريم وبيت ابني ومركز الأم تريزا وبيت السامري الصالح وبيت الله محبة وبيت صوفي وسوق الأربعاء المجاني وسلسلة المطاعم المجانية وصالون الحلاقة المجاني

من هالخيمة صار عنا شباب حققوا أعلى المراتب بالمجتمع اللبناني، واليوم هني مصدر فخر لأهلن، منن تجوزوا وعملوا عيلة ومنن عطريق نذر الكهنوت ومنن استرجعوا دراساتن وأخدوا شهادات وصاروا بمراكز مرموقة. من هالخيمة، من مركز جمعيتنا بالمعيصرة هالمكان النموذجي لفعل الحب والخير، رح نطلق حملة تيليتون مباشر عبر تلفزيون تيلي لوميار نورسات نهار الجمعة المقبل 23 حزيران، تنطلب من الناس يساعدونا نشتري الأرض يلّي نحنا عايشين فيها تيصير عنا القدرة نجيب رخص للمياه والكهرباء، ولتقدر تستمر جمعيتنا من دون أي عائق. المتر بـ 80$ وكل ما حدا اشترى متر رح يكون إلو رسالة شكر من جمعيتنا، ومع كل متر منكون عم نعمّر حجر أساس لسعادة السما. بهالأمتار انتصرنا، بهالأمتار جبنا الأحداث لأنو محلُّن مش بالسجن، بهالأمتار حققنا أروع الأحلام، بهالأمتار يسوع شفي المدمن، بهالأمتار رح تستمر الجمعية، وبهالأمتار رح نحتفل هيدا الأحد بقداس مباشرة عبر تيلي لوميار بيترأسه صاحب السيادة المطران عصام يوحنا درويش بيعاونه المطران ابراهيم ابراهيم والمطران جاورجيوس ادمون ضاهر. وهالقداس رح يكون ضمن إطار حملتنا وبيتخلله رتبة غسل لشاب من ولادي شفي من الإدمان، منلبسو التوب الأبيض، ثوب الابن الضال

المدمن ضحية، وإذا ركّزنا عكلمة ضحية وتعاملنا معو على هالأساس منكون خطينا أول خطوة بدرب الشفاء. ناطرينكن تكونوا معنا وتدعمونا بحملتنا “لا للمخدرات” خلال هالشهر. وشكراً